"شریکاں نوں اگ لگدی"
کیا کہیئے گا اس لفظ کے بارے کہ جس کی ابتداء ہی "شر" سے ہو۔ یوں تو اور بھی الفاظ ہیں کہ جو "شر" سے شروع ہوتے ہیں خصوصاً شرافت تو ہے ہی "شر" اور "آفت" کا گٹھ جوڑ لیکن جس شر کی طرف توجہ مبذول کروانے کی جسارت کی اس کا شر، شرکت کے "شر" سے مستعار ہے۔ کہا جاسکتا ہے کہ جہاں شرکت ہوگی، شراکت ہوگی وہاں "شر" پیش پیش رہے گا۔
قصہ پہلے قتل ہونے والے بھائی کا ہو یا پھر مصر میں بکنے والے بھائی کا، شیطان کا انکار ہو یا یا پھر فرشتوں کی فریاد ہو، بات ہو ظالم فرعون کی یا مظلوم قومِ موسیٰ کی ۔ ۔ ۔ جہاں بھی بات شراکت کی ھوگی سمجھ لیجئے وہیں "شریکا" ہے۔ یہاں تک کہ مسلمانوں اور یہود و نصاریٰ کے درمیان بھی "شریکا" ہی ہے ہم مسلمان حضرت ابراہیم علیہ السلام کے بیٹے حضرت اسماعیل علیہ السلام کی نسل سے آنے والے پیغمبر کے امتی ہیں اور نصاریٰ حضرت اسحاق علیہ السلام کی اولاد سے مبعوث پیغمبر حضرتِ عیسیٰ علیہ السلام کے ماننے والے ۔ ۔ ۔
عموماً ہمارے ہاں "شریکے" سے مراد لی جاتی ہے ددھیال اور ننھیال کے قریبی رشتہ دار یعنی چچا، تایا، پھپھو، خالہ، ماموں اور ان کی اولادیں۔ یہ رشتہ دار جہاں انتہائی قریبی گِنے جاتے ہیں وہاں انتہائی فریبی بھی۔ جہاں ایک دوسرے کے بازو بنتے ہیں وہاں ایک دوسرے کے بازو کاٹتے بھی ہیں۔ جہاں ایک دوسرے کا دم بھرتے نظر آتے ہیں وہیں ایک دوسرے کی ناک میں دم کردینے میں بھی کوئی کسر نہیں اٹھا رکھتے۔
یہ شکایت آج کل کے ہر دوسرے بڑے بزرگ کو ہے کہ بچے اپنے بڑوں کا ادب نہیں کرتے لیکن دیکھنے والی بات یہ ہے کہ ایسا تأثر ان میں کیوں پروان چڑھ رہا ہے؟ آپ کسی بھی خاندان کی مثال لے لیں: تایا پھپھو سے ناراض، پھپھو چچا سے خفا، ممانی کی خالہ سے ان بن وغیرہ وغیرہ۔ ایسے میں جب بھی کبھی کوئی خوشی کا موقع ھو تو سب کو ایک تقریب میں اکھٹا کرنا جوئے شیر لانے کے مترادف ہی ہوتا ہے۔ عین تقریب کے وقت جو ناراض ہو جائیں انہیں "بڑی پھپھو" کہتے ہیں، جو صاحب دیگوں کی رکھوالی کا ذمہ سنبھال کر کہیں کہ "نئیں بوٹی تھوڑی کچی رہ گئی اے" وہ بڑے تایا ہوں گے اور جو ہر وقت منہ پھلائے رہیں گی وہ ممانی اور خالہ، وجہ جاننے کی کوشش میں ہلکان مت ہوں یہ وجوھات گھڑنے میں اپنا ثانی نہیں رکھتیں۔
جب ہر پہر یہی باتیں ہوں کہ
ان کا گھر ھمارے گھر سے بڑا ہے۔
ان کی گاڑی بڑی ہے۔
صوفے دیکھے؟
پینٹ پھر بدل لیا ہوگا؟
بھابھی کے کنگن تو کوئی چار ایک تولے کے لگ رہے تھے،
تو بچوں کے دلوں میں بغض و کینہ، دماغ میں اوچھے ہتھکنڈے اور زبان پہ زہر کیوں نہ ہو؟ ادب تو خاک ہو کر خاک بھی نہ آئے۔
اور اس جلتی پر تیل کا کام کرتا ہے ہمارا تعلیمی ماحول۔ ایک کزن کو دوسرے کا دشمن بنا کر پیش کیا جاتا ہے۔ اگر اس سے کم نمبر آئے تو آپ کا جینا حرام نہیں تو اس کا۔ تھوڑی سمجھ بوجھ آئے اور بچہ شادی کے قابل ہو تو نئے مسائل کہ خاندان میں شادی کرنی ہے یا نہیں؟ اور اگر کرنی ہے تو ددھیال میں کہ ننھیال میں؟ اور اگر ایسے میں کسی کے آئے ہوئے رشتے کو انکار ہوجائے تو بس جی بس! آپ ان کے لیے اور وہ آپ کے لیے مرگئے۔
یہ تمام احوال ہمارے اسی معاشرے کے رِستے ہوئے زخم ہیں اور ہر دوسرے گھر کی کہانی۔
کیا ہمارا پڑھا لکھا ہونا ہمیں یہی سکھاتا ہے؟
ھماری دینی تعلیمات اس بارے میں کیا رہنمائی کرتی ہیں؟
اخلاقیات کا کیا تقاضا ہے؟
کیا ہم دوسروں کے لیے بھی وہی پسند کرتے ہیں، جو خود اپنے لیے؟
حسد، کینہ اور بغض ہمارے لیے کسی خیر کا سامان ہوسکتے ہیں؟
کیا ہماری خود ساختہ انا ہماری اور ہمارے بچوں کی خوشیوں سے عزیز ہے؟
سوال بہت ہیں اور ان سب سوالوں کا جواب ہمیں جلد یا بہ دیر دینا ہی ہے۔ معاشرے میں جتنی نفرت ہم پھیلا چکے ہیں اس کا تدارک آج بھی شروع کریں تو شاید کہ آنے والی نسلیں اس ناسور سے چھٹکارا پاسکیں۔
